A sede de Down Galicia en Santiago de Compostela foi hoxe escenario dunha xornada de sorrisos. Mozos e mozas de Down Galicia e empregados de BBVA gozaron dun taller de risoterapia no que compartiron divertidos momentos e co que se presentou unha nova edición do programa de prácticas formativas impulsado pola entidade bancaria.
Este programa, pioneiro en España, ten por obxectivo promocionar a inclusión socio-laboral das persoas participantes, a través na realización de prácticas formativas en oficinas galegas da entidade bancaria. Enmarcado no programa “Emprego con Apoio”, os mozos e mozas participantes adquirirán unha experiencia laboral que lles axudará no proceso de procura de emprego, ademais de mellorar as súas habilidades sociais para a súa integración en diferentes equipos de traballo.
O Presidente de Down Galicia, Delmiro Prieto, resaltou a importancia das oportunidades laborais para as persoas coa síndrome de Down e a transcendencia deste tipo de iniciativas. “O principal valor deste programa reside na visibilidade que outorga ás persoas que participan no mesmo, posto que poderán ser percibidas polo público, os clientes do banco, e os compañeiros e compañeiras de oficina, como persoas útiles e capaces”.
Pola súa banda, Yolanda Martínez-Bajo, directora da Territorial Noroeste de BBVA destacou tras o taller que “o sentido do humor fai que a nosa mente estea continuamente en funcionamento, fainos ser máis creativos, máis innovadores e mirar ao futuro con ilusión”. “Os máis de 70 mozos e mozas galegos coa síndrome de Down que pasaron polas nosas oficinas desde o 2012, demostráronnos o poder do seu sorriso. Nun contexto como o actual, todos sabemos o complicado que é alcanzar metas. Pero quen mantén a ilusión e persegue os seus soños, é capaz de conseguilo”, engadiu.
Para pechar a quenda de intervencións, Iria Curra, usuaria de Down Galicia e participante neste programa de prácticas, agradeceu en nome dos seus compañeiros e compañeiras “as prácticas en BBVA, xa que puidemos aprender moitas cousas”. Destacou o compañeirismo co que se están atopando nas oficinas, xa que “todos os compañeiros e compañeiras de traballo están a portarse moi ben connosco e estannos ensinando a facer as tarefas” e pechou o seu discurso cun reivindicativo “Grazas por deixarnos amosar as nosas capacidades”.
O sorriso é un idioma universal, e valores como a empatía, a colaboración ou o respecto están vinculados a ela. Nesta xornada amenizada por un taller de risoterapia entregáronse os diplomas aos participantes do 2016 e recibiuse aos mozos e mozas que este ano realizarán as prácticas formativas.
Programa de prácticas formativas en Galicia
Desde 2012, máis de 70 mozos e mozas beneficiáronse deste programa promovido pola Oficina de Voluntarios de BBVA. Agora, a iniciativa repítese en Galicia un ano máis co obxectivo de obter en 2017 tan bos resultados como os xerados nas súas anteriores edicións.
Ao longo deste ano, os 16 mozos e mozas participantes de Down Galicia traballarán, na maior parte dos casos, en sesións de catro horas diarias durante un período dun mes cada un en actividades administrativas: arquivar e destruír documentos, fotocopiar expedientes e documentacións diversas, ordenar fichas de firmas, arquivar contratos e documentación xerada no día e tratar recibos, entre outras funcións.
A experiencia adquirida grazas a este programa favoreceralles nas súas posibilidades de inserción laboral posterior. As prácticas desenvolveranse en 11 oficinas de BBVA de Galicia, onde a entidade bancaria espera xerar unha experiencia moi positiva e de gran valor non só para os mozos participantes, senón tamén para os empregados do Banco.