A Fundación Once para a cooperación e inclusión social de persoas con discapacidade continúa apoiando o proxecto de “Emprego con Apoio” que Down Galicia, en colaboración coas súas entidades membro, leva a cabo na Comunidade Autónoma de Galicia. Desta forma, persoas coa síndrome de Down ou discapacidade intelectual contan cunha serie de apoios encamiñados a conseguir a súa inclusión no mercado laboral ordinario.
En virtude desta achega, que neste período 2015-2016 elévase ós 7.280€, un total de 30 persoas coa síndrome de Down e discapacidade intelectual contaron con apoios para a procura activa de emprego, mentres que outras 44 persoas tivéronos en materia de mantemento do posto de traballo que ocupan en empresas ordinarias.
Das 74 persoas participantes neste proxecto, 9 delas asinaron 10 convenios de prácticas, polo que unha persoa contou con dúas oportunidades formativas. En canto ás contratacións, 21 persoas asinaron un total de 29 contratos, incluíndo unha prórroga. A totalidade destas contratacións son temporais e a tempo parcial, o que dificulta a consecución dunha estabilidade laboral e un proxecto de vida.
Ademais, durante este período, contactáronse un total de 297 empresas de toda Galicia co obxectivo de lograr unha oportunidade laboral para algunha das 30 persoas destinatarias deste proxecto en fase de procura de emprego, pero tamén para conseguir a continuidade no posto dalgunhas das 44 persoas usuarias en fase de mantemento.
Este proxecto levouse a cabo practicamente en toda a xeografía galega, especialmente nas capitais de provincia e nas súas cidades máis importantes, aínda que tamén noutros concellos aos que pertencen as persoas participantes no mesmo como Vedra, Narón, Baiona, Ponteareas, Redondela ou Mos.
Desde o ano 2002, as entidades Down en Galicia desenvolven o programa “Emprego con Apoio”, deseñado para atender especificamente as necesidades e barreiras que as persoas coa síndrome de Down e/ou discapacidade intelectual atopan á hora de tentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción sociolaboral e asegurar a súa correcta incorporación ó posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de maneira positiva e natural.
Paralelamente, as entidades Down realizan un labor de prospección laboral co fin de dar a coñecer esta iniciativa entre o tecido empresarial e conseguir a súa colaboración por medio de contratos e/ou prácticas laborais. Neste sentido, a participación e a cada vez maior presenza das persoas con discapacidade intelectual nas empresas ordinarias contribúe de maneira eficaz a desterrar os tópicos que tradicionalmente se lles atribúen a este colectivo, resultando unha maneira sumamente eficaz de inclusión social.