Un asasinato e un malvado pallaso son os eixos centrais de “Amizades perigosas” e “Cóxegas malditas”, dúas curtametraxes realizadas por mozos e mozas de Down Pontevedra “Xuntos” coas que conseguiron o 3º e o 5º premio, respectivamente, no certame D-medo organizado polo Concello de Barro.

Artellados nun pequeno grupo, os membros de Xuntos idearon dous guións orixinais do xénero do terror, secuenciaron as escenas, escolleron o vestiario, seleccionaron a música e planificaron a gravación na cidade do Lérez. Trala edición e a montaxe, na que contaron coa colaboración dos profesionais da entidade, o resultado conseguido foi todo un éxito.

A continuación deixámosvos as curtas para que xulguedes por vós mesmos.

Con este tipo de actividades trabállanse contidos máis transversais e póñense en práctica materias do eido da comunicación e da lectoescritura que habitúan a ser máis teóricas.

Este concurso, un clásico das noites de Samaín no municipio barrense, tiña como obxectivos explorar e dar a coñecer a creatividade audiovisual, fomentar o traballo en equipo e descubrir novos campos para ocupar o tempo libre, entre outros.

As pezas presentadas, todas ambientadas na noite de Defuntos e dun máximo de 3 minutos, foron proxectadas na noite do 31 de outubro no Pazo da Crega e valoradas por un xurado experto formado por Lucía Estévez, Alejandra Sotelo e Diana López Varela. Estévez é guionista, directora e xurado no Festival Internacional de Cinema (OUFF). Sotelo é montadora de programas na TVG e Varela é guionista na TVG, escritora e xornalista.

Os premios acadados polos integrantes de Xuntos, consistiron en varios pases para as Termas de Cuntis e unha cea no restaurante “A Muiñada da Barosa”.

Noraboa!