Down Galicia esixe que a normativa educativa garanta a igualdade de oportunidades para as persoas con discapacidade intelectual
Nacións Unidas acaba de poñer en dúbida o sistema educativo español, ao que acusa de segregador e do que di que viola sistematicamente o dereito á educación do alumnado con discapacidade. Nun informe publicado esta semana en Xenebra, a organización expón que “a segregación e exclusión de España dos e das estudantes con discapacidades da educación xeral, pola súa discapacidade, equivale a violacións graves ou sistemáticas do dereito á educación deses estudantes en virtude da Convención sobre os dereitos das persoas con discapacidade”.
“O sistema educativo paralelo establecido para aquelas persoas estudantes con discapacidades que non encaixan nas escolas xerais convértese en traxectorias paralelas da vida escolar, o emprego e máis tarde a residencia, o que leva a resultados de vida moi diferentes”, dixo a Sra. Theresia Degener, Presidenta do Comité da ONU sobre os dereitos das persoas con discapacidade.
O comunicado é resultado dunha investigación realizada entre o 30 de xaneiro e o 10 de febreiro de 2017, na que expertos designados polo Comité entrevistaron a máis de 165 persoas, incluídos funcionarios do Goberno e das 17 comunidades autónomas, representantes de organizacións de persoas con discapacidade e outras organizacións da sociedade civil.
Down Galicia considera urxente a reforma da lexislación educativa e a implantación dun sistema que respecte o principio de educación inclusiva, baseado na igualdade de oportunidades e que non discrimine ás persoas por razón da súa discapacidade. A Federación leva desde hai anos poñendo de manifesto que o sistema educativo español é discriminatorio coas persoas coa síndrome de Down e vulnera o establecido no artigo 24 da Convención sobre os Dereitos das Persoas con Discapacidade.
O dereito a unha educación inclusiva está avalado pola Convención Internacional da ONU sobre os Dereitos das Persoas con Discapacidade, que no seu artigo 24 recoñece que “os Estados asegurarán un sistema de educación inclusivo a todos os niveis para as persoas con discapacidade”. Esta Convención foi ratificada en 2008 e aprobada por unanimidade polo noso Parlamento e é de obrigado cumprimento en España ao ter rango de tratado xurídico internacional de Dereitos Humanos.
Entradas relacionadas
