Jacobo Rey González, un mozo coa síndrome de Down de Ourense, asinou esta mañá o contrato que o converte en funcionario da Xunta de Galicia. Nunhas semanas comezará a súa andaina como ordenanza na xefatura territorial que a Consellería de Medio Rural ten na cidade de Ourense.

Nun acto presidido polo Conselleiro de Facenda, Valeriano Martínez, as seis persoas que acadaron as prazas ofertadas pola Xunta de Galicia, reservadas en exclusiva para persoas con discapacidade intelectual, tomaron posesión das mesmas tras presentar a documentación requirida e elixir a praza desexada.

Jacobo comezou a prepararse en xaneiro de 2015 e o de ordenanza era o segundo proceso selectivo ao que se presentaba. Durante meses, coa constancia por bandeira, Jacobo dedicou moitas horas do seu día a día ao estudo desta oposición.

Antes de saber que fora merecedor dunha das prazas de ordenanza da Xunta, xa estaba a preparar o seu seguinte proceso selectivo, que compatibilizaba co desempeño dun traballo tamén como ordenanza. “Traballaba pola mañá e estudiaba pola tarde as seguintes oposicións, á Administración central”, comenta Jacobo. Agora ve o seu soño feito realidade.

No acto, que tivo lugar na sede da Xunta de Galicia en San Caetano, tamén participaron o Director Xeral de Función Pública, José María Barreiro Díaz; a Subdirectora Xeral de Provisión de Postos e Selección de Persoal, Raquel Souto García; e a Subdirectora Xeral de Xestión, Programación e Ordenación de Persoal, Ana María Tovar Bobo.

Na súa intervención, Valeriano Martínez quixo felicitar aos novos funcionarios e funcionarias, salientar o seu esforzo e dedicación e animalos a seguir formándose  para progresar no seu camiño pola función pública.

O acceso ó emprego público para as persoas con discapacidade intelectual en xeral, e coa síndrome de Down, en particular, é unha das reivindicacións históricas da Federación Down Galicia.