“As persoas con discapacidade intelectual teñen as mesmas necesidades de orientación académica e profesional que o resto”
© Xunta de Galicia
Grazas aos convenios asinados entre a Consellería de Política Social e a Fundación Down Compostela, a Asociación Down Lugo e a Asociación Teima Down Ferrol, doce mozos e mozas coa síndrome de Down e outras discapacidades intelectuais realizarán prácticas laborais en centros e servizos da Xunta de Galicia durante o ano 2019.
Segundo Fabiola García, conselleira de Política Social, estes acordos, asinados o pasado venres en San Caetano, teñen como finalidade “darlle ás persoas con discapacidade a oportunidade que merecen para amosar a súa valía no ámbito social e profesional”.
Esta é a terceira vez que a Consellería abre as portas a persoas coa síndrome de Down para que completen a súa formación en dependencias da Administración autonómica. O primeiro convenio foi asinado en 2016 coa Fundación Down Compostela e, grazas a el, tres persoas puideron facer prácticas nas dependencias administrativas de San Caetano. Posteriormente, no ano 2018, este convenio estendeuse a Ferrol e Lugo.
Das 12 persoas que participarán este ano nesta iniciativa, oito traballarán na residencia de maiores de Caranza en Ferrol, dúas o farán na residencia A Milagrosa de Lugo e nun equipo de valoración da discapacidade e outras dúas prestarán servizo no complexo de San Caetano, en Santiago de Compostela. A duración das prácticas das 12 persoas seleccionadas polas tres entidades Down para este programa será de 20 horas semanais como máximo, e a súa incorporación será paulatina ao longo da duración dos acordos, que estarán vixentes ata o 31 de decembro de 2019.
A Consellería de Política Social destina 60.000 euros a esta iniciativa, 20.000 euros para cada unha das entidades, que se destinarán a dotar dunha beca de prácticas a cada participante e a sufragar parte dos gastos dos e das preparadoras laborais que as acompañarán durante este período de formación.
Fabiola García explicou que o obxectivo é dotar aos participantes das competencias e aptitudes necesarias para facilitar e mellorar a súa integración no mercado laboral, o que ademais de ser útil para estas persoas tamén “será enriquecedor para todas e todos os que teñamos o privilexio de traballar con elas”. Ademais, puxo en valor a capacidade das persoas coa síndrome de Down para superar obstáculos e romper prexuízos, xa que “ante as adversidades demostran esforzo e constancia, e cando lles damos unha oportunidade demostran ser capaces de facer todo o que se propoñen”, afirmou.
Entradas relacionadas
