Down Galicia e Clece alíanse para promover a inclusión laboral das persoas con discapacidade intelectual
A confianza empresarial no programa de Emprego Con Apoio (ECA) de Down Pontevedra “Xuntos” para persoas coa síndrome de Down e outras discapacidades intelectuais segue crecendo na comarca da cidade. Arume, empresa de restauración que presta os servizos de comedor escolar nos colexios públicos de Pontevedra, vén de realizar en outubro unha nova inserción entre os membros da asociación contando co talento de Cecilia De Los Santos.
A moza pontevedresa uniuse ao equipo de comedor do CEIP Manuel Vidal Portela, onde realiza funcións de monitora todos os mediodías de luns a venres. Cecilia é a terceira usuaria do programa ECA de “Xuntos” que é contratada por Arume, xa que anteriormente a empresa confiou en Diego Touriño, que traballou hai dous anos durante todo o período escolar no mesmo centro, e en Víctor Vázquez, que leva empregado desde 2016, asinando o pasado mes de marzo un contrato indefinido con esta.
Cecilia, que se mostra moi motivada no seu novo emprego, “adaptouse desde o primeiro momento a un traballo que require moita axilidade, atención e organización das tarefas, ademais cabe destacar a súa boa actitude e predisposición, sempre chega ao seu posto cun sorriso, que o equipo de traballo agradece”, afirma Ángela Patricio, preparadora laboral de Xuntos, cuxa función é apoiar á traballadora durante a súa adaptación ao posto. “Encántame esta moza, traballa moi ben e integrouse enseguida connosco, é moi sociable”, apunta Patricia, a súa compañeira de traballo no comedor.
Capacidade para o pluriempleo e a formación continua
Cecilia compaxina desde a súa incorporación a Arume o seu novo emprego co seu posto no Coworking Espazo Arroelo de Pontevedra, onde desempeña as funcións de ordenanza desde 2016. O seu bo desempeño e continuidade valeulle para asinar nos últimos días o seu contrato indefinido con esta empresa. “Cecilia cambiou a nosa forma de ver a organización e grazas a ela temos unha perspectiva moito maior á hora de traballar en equipo. Nós non nos vemos na empresa sen ela, é unha peza esencial para que toda a engrenaxe organizativa funcione”, explica a xerente do coworking, África Rodríguez.
Ademais de poder compatibilizar ambos os empregos, Cecilia é unha persoa proactiva, que segue formándose a pesar da súa situación de pluriemprego. A moza prepara actualmente oposicións e séguese formando en “Xuntos” para acadar unha autonomía plena e inclusiva.
Programa Emprego Con Apoio (ECA)
Desde o ano 2002, as entidades Down en Galicia desenvolven o programa Emprego Con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de tentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de maneira positiva e natural.
Cada vez é máis habitual que novos sectores profesionais abran as súas portas á inserción laboral de persoas con discapacidade, o que é un claro sinal de que a nosa sociedade vai avanzando aos poucos cara a un verdadeiro modelo de sociedade inclusiva.
Entradas relacionadas
