Foto: La Región
O pasado 1 de febreiro, Ismael e Martina, membros da asociación Down Ourense, comezaron un período de tres meses de prácticas formativas en distintas instalacións da Universidade de Vigo.
Ambos foron dúas das tres persoas beneficiarias das bolsas de formación que a Vicerreitoría da institución educativa ofertou a través dunha convocatoria co obxectivo de promover a inclusión laboral de persoas con diversidade intelectual.
O primeiro paso foi presentar os seus currículos á oferta e, despois da análise dos mesmos, foron chamados a realizar unha entrevista persoal. Tras un proceso de avaliación, alzáronse coas prazas ao ser dúas das tres persoas con maior puntuación das que se presentaron ao proceso.
As tres bolsas, que rematarán a finais do mes de abril, cobren as especialidades de auxiliar nas diferentes actividades e servizos ofrecidos en cada un dos edificios.
Ismael realiza as súas prácticas formativas como conserxe no edificio xurídico-empresarial e asegura que se animou a participar porque é “unha gran oportunidade para ter unha mellor experiencia laboral”.
Martina, pola súa banda, lévaas a cabo no Pavillón deportivo do Campus de Ourense. Entre as súas tarefas están as de abrir as portas, acender as luces, atender a recepción, revisar as instalacións ou comprobar os carnés das persoas asistentes.
