O proxecto “Crecendo en familia” da asociación Down Coruña vén de conseguir un dos 27 premios da segunda convocatoria lanzada pola xestora de fondos BBVA Asset Management.

Esta iniciativa, premiada con 37.000 €, ten como obxectivo principal brindar apoio e información a pais e nais que acaban de ter un fillo ou filla coa síndrome de Down, pero tamén busca dar soporte ás 108 persoas usuarias da entidade e ás súas familias.

“Crecendo en familia” conta con servizos de atención mediante espazos de escoita, grupos de pais e nais expertos, a difusión do servizo en hospitais ou a supervisión e axeitado seguimento do Plan Nacional de Saúde para Persoas coa síndrome de Down.

A entrega do galardón tivo lugar a semana pasada nun acto telemático no que participaron Yolanda Martínez-Bajo, directora territorial de BBVA na zona noroeste; David Carrasco, director comercial e de marketing de BBVA Asset Management; Ricardo Santos Rodríguez, presidente de Down Coruña; e José Rodríguez Díaz, xerente da asociación.

Santos agradeceu o recoñecemento e resaltou a importancia de que nun momento como o actual “as persoas con discapacidade non queden descolgadas”.

Vegalsa-Eroski dona máscaras de protección á asociación

O grupo Vegalsa-Eroski, líder no sector da distribución en Galicia, fixo entrega hai uns días a Down Coruña de 150 máscaras da marca MOxAdTech, que serán repartidas entre as persoas usuarias da entidade.

Estas máscaras textís están avaladas polo Centro Tecnolóxico CITEVE e contan coa certificación OEKO-TEX, que demostra a ausencia de produtos químicos nocivos durante o proceso de fabricación, ademais de garantir protección respiratoria ante partículas externas.