Down España esixe que non se abandone ás persoas coa síndrome de Down maiores de 40 anos

ATempera
Envellecemento
Emprego
Educacion
Autonomia

» Down España esixe que non se abandone ás persoas coa síndrome de Down maiores de 40 anos

Unha vez máis, desde Down España e Down Galicia, dirixímonos ás persoas responsables de Saúde Pública do Ministerio de Sanidade e da Consellería de Sanidade da Xunta de Galicia para esixir a inclusión explícita na Estratexia de vacinación das persoas coa síndrome de Down maiores de 40 anos, pois, tal e como xa demostraron varios estudos científicos, o seu risco ante a COVID-19 é moi elevado.

Durante estes días, nalgunhas Comunidades está a vacinarse ás persoas de 70-80 anos en diante, sanitarios e profesionais cuxa exposición ao virus sexa alta e estase deixando de lado a priorización das persoas que pola súa natureza ou por diferentes comorbilidades teñen unha gravidade asociada en caso de contaxio.

Down España e Down Galicia piden que non se abandone á súa sorte ás persoas coa síndrome de Down adultas, moito menos cando xa hai unha sólida evidencia científica que sinala o risco que corren en caso de contaxio por COVID-19, avalada agora mesmo pola publicación ‘Vulnerabilidade médica das persoas coa síndrome de Down ao COVID-19’ na revista THE LANCET, baseada no estudo desenvolvido por T21RS, a sociedade científica internacional de investigación sobre a síndrome de Down. Nela, apúntase que “unha persoa coa síndrome de Down de 40 anos ou máis ten un risco incrementado similar ao de alguén 30 anos maior e, en conxunto, teñen o triplo de posibilidades de desenvolver unha enfermidade severa ou de falecer”.

Non é comprensible que se recoñeza a importancia deste achado e que, ao mesmo tempo, o Grupo de traballo técnico de vacinación COVID-19 do Ministerio de Sanidade, que elabora e actualiza a Estratexia de Vacinación, aínda non o tivera en conta.

Afortunadamente, un bo número de persoas coa síndrome de Down maiores de 40 anos foron vacinadas ao residir en institucións asistenciais ou residencias, pero é urxente que a vacinación chegue a todas elas –tamén ás que viven nos seus domicilios con ou sen os seus familiares-, a través de citacións dos seus Centros de Saúde.

Down España ofreceu, tanto ao Ministerio como ás comunidades autónomas apoio para difundir información sobre a importancia da vacinación para as persoas coa síndrome de Down, pero é necesario que se tome unha decisión de priorización canto antes, xa que a dificultade de subministración de vacinas dispoñibles non xustifica o que non as tivesen en conta xa.