Down Galicia foi unha das entidades beneficiarias da edición especial de Nadal do programa ‘Atrápame se podes’ da Televisión de Galicia, un concurso que regresou á grella nestas datas cun formato solidario e familiar, destinado a apoiar diferentes organizacións sen ánimo de lucro.
O espazo, presentado por Rodrigo Vázquez, emitiuse durante estas festas e contou coa participación de persoas coñecidas do ámbito do audiovisual galego, que competiron por parellas co obxectivo de recadar fondos para causas sociais a través dos botes acadados en cada programa.
Con esta iniciativa solidaria, Down Galicia recibiu unha doazón de 1.800 euros grazas á participación de Bernardo Montaña e Rocío Durán. Esta achega destinarase ao desenvolvemento dos seus programas e servizos de apoio ás persoas coa síndrome de Down e ás súas familias en toda Galicia.
O especial de Nadal de ‘Atrápame se podes’ mantivo a esencia do concurso habitual, baseado en probas de axilidade mental e cultura xeral, adaptando o formato para facelo máis próximo ao público familiar e incorporando un marcado compoñente solidario.
Durante estas emisións especiais, cada programa destinou integramente o diñeiro recadado a unha entidade social distinta, contribuíndo así a dar visibilidade ao labor de organizacións que traballan a prol da inclusión e do benestar social.
Desde Down Galicia queremos agradecer a TVG, ao equipo do programa ‘Atrápame se podes’ e ás persoas participantes nesta edición especial de Nadal o apoio recibido, que supón unha importante axuda para seguir avanzando na construción dunha sociedade máis inclusiva.