Contratación indefinida en Recambios Quasar
Iván, usuario do servizo de Emprego con Apoio de Down Vigo, acaba de incorporarse de novo ao mercado laboral a través dun contrato indefinido na empresa Recambios Quasar, cuxa actividade se centra na comercialización de motores de arranque e alternadores para o automóbil.
O seu posto de traballo está relacionado coas actividades auxiliares de almacén e coas xestións derivadas da actividade da empresa, tales como a entrega de documentación, o envío de cartas ou a compra de material.
Iván fai un balance moi positivo destas primeiras semanas, a pesar do “medo pola COVID-19”. Quere aproveitar a oportunidade de “volver ter un traballo” para gozar da autonomía que ofrece ter un soldo cada mes.
Nova formación para preparar o exame teórico do carné de conducir
O servizo de Formación puxo en marcha esta semana unha formación específica para que 12 persoas usuarias da entidade poidan presentarse ao exame teórico do carné de conducir.
Trátase dun curso intensivo de dous meses que combinará formación presencial e telemática e no que se ofrece unha atención individualizada, tomando como referencia o sistema de exame da Dirección Xeral de Tráfico (DXT). Todos os materiais foron adaptados a lectura fácil.
As clases están programadas cun enfoque teórico-práctico, de maneira que en cada sesión trabállanse aspectos concretos do manual e aplícase esta teoría a situacións reais, a través de cuestionarios que están dispoñibles tanto en papel como en formato dixital. Así, os obxectivos específicos pretenden aumentar as competencias instrumentais do alumnado, inculcar as responsabilidades que leva consigo o uso dun vehículo motorizado e adquirir unha formación viaria actualizada, que poidan aplicar tanto no rol de condutores e condutoras como no de peóns.
Esta formación está dirixida a mozos e mozas que, tendo xa experiencia no mercado laboral, necesitan mellorar a súa capacitación profesional para adaptarse ás demandas das empresas e así ter oportunidades reais de obter un emprego.
