“…limpar o brócoli quitándolle os talos grosos, pelar e cortar os allos, poñer auga a ferver cunha cullerada de sal…”
Así comeza unha das sinxelas e saudables receitas que elaboran semanalmente as persoas participantes no programa de Autonomía Doméstica de Down Lugo.
Este programa leva en activo máis de 13 anos e, actualmente, participan nel un total de 17 persoas con síndrome de Down e outras discapacidades intelectuais, que, en pequenos grupos, entran na cociña da asociación e póñense mans á masa.
Cada semana, un dos cociñeiros ou cociñeiras do grupo escolle unha receita para, xunto co resto dos seus compañeiros e compañeiras, elaborala cos ingredientes que compran no supermercado da zona. Ademais das tarefas propias da receita como cortar, pelar, lavar, fritir ou cocer, repártense outras como poñer a mesa, fregar a louza, pasar a fregona ou limpar a vitrocerámica, por exemplo.
O principal obxectivo deste programa é que as persoas participantes adquiran as habilidades, as destrezas e os coñecementos básicos necesarios para desenvolverse con autonomía nas tarefas do fogar.
Pero, en realidade, participar neste programa ten moitas máis aprendizaxes que os meramente domésticos, xa que á hora de cociñar póñense en práctica outros coñecementos e habilidades como a lectoescritura, a comprensión lectora, o cálculo, a capacidade de organización… e cada día refórzanse valores tan importantes como a responsabilidade, o traballo en equipo, a tolerancia, a paciencia, o respecto ou a prudencia.
Ahhh!!! Soa o timbre da vitro! Toca probar a receita!