Este mes de xullo, Ana e Rocío, usuarias de Down Vigo, pasaron a formar parte do persoal que realiza as tarefas de limpeza no primeiro albergue de Vigo para peregrinos do Camiño da Costa. Contratadas pola empresa Clece, o seu traballo consiste na limpeza e desinfección das instalacións do recentemente estreado edificio, inaugurado o pasado 29 de xuño e situado na praza do Berbés.
O perfil laboral de limpeza, ademais de ser fundamental nestas instalacións de uso público, cobra especial importancia por mor da situación de emerxencia sanitaria derivada da COVID-19. Hoxe máis que nunca, realizar as tarefas deste posto con rigor e profesionalidade é unha cuestión de saúde pública.
Ana e Rocío están ilusionadas con esta nova etapa laboral nas súas vidas. Ambas tiñan experiencia no sector da limpeza, pero resaltan a importancia de ter un contrato laboral “de máis horas” que noutras ocasións, o que lles axudará a alcanzar un maior nivel de autonomía persoal.
As primeiras impresións de Ana son positivas, xa que “hai autobús que a deixa moi preto” e ademais ten “boas compañeiras”. Rocío, pola súa banda, fai fincapé en que lle gusta “todo” do seu novo traballo; sobre todo, ter un contrato con máis carga laboral que os que obtivera anteriormente”.
Nova incorporación laboral en Alcampo
Por outra banda, Guillermo, que tamén forma parte do Servizo de Emprego con Apoio de Down Vigo, incorporouse o pasado 1 de xullo ao persoal do Centro Comercial Alcampo Vigo-II, no posto de “persoal base”. Trátase da segunda persoa da entidade que está contratada na actualidade pola empresa, que leva colaborando con Down Vigo desde o ano 2003.
As funcións de Guillermo desenvólvense na liña de caixas, retirando as cestas para levalas ao momento de desinfección, recollendo e clasificando mercadoría devolta e levando cambio en efectivo ao persoal de caixas cando o solicitan.
Tras un período de prácticas de quince días e unha valoración positiva no desempeño do seu traballo, Guillermo logrou o seu obxectivo: un contrato laboral que contará cunha duración inicial de tres meses.
Sobre o seu traballo, Guillermo destaca a ilusión coa que afronta este novo reto, decidido a desempeñar as tarefas con boa actitude e ganas. Sobre o período de prácticas, explica que as funcións que máis esforzo lle supuxeron foron “contar ben o diñeiro ou colocar a mercadoría no almacén”.
A incorporación de Guillermo consolida aínda máis os lazos de unión entre o Centro Comercial Alcampo Vigo-II e Down Vigo, despois da boa experiencia na sección de Reposición.