O Servizo de Orientación Laboral de Down Galicia atende a 252 persoas usuarias de entidades Down desenvolvendo máis dun milleiro de accións
A Fundación Ibercaja, a través da súa Convocatoria 2020 de Proxectos sociais, colabora co proxecto “Emprego Con Apoio: Talento profesional de persoas coa síndrome de Down e/ou discapacidade intelectual” que a Federación Down Galicia desenvolve nos seus 7 centros de atención nas principais cidades galegas: Santiago, A Coruña, Ferrol, Lugo, Ourense, Pontevedra e Vigo.
A través deste soporte económico, 70 persoas coa síndrome de Down e outras discapacidades intelectuais en idade laboral participaron no programa co obxectivo de facilitar a súa inclusión socio-laboral, mellorando nos seus niveis de autonomía, habilidades, independencia e capacitación para o emprego.
Deste xeito, pódese dicir que a contribución da Fundación Ibercaja tivo como beneficiarias, de forma directa, a estas 70 persoas usuarias do proxecto e, de maneira indirecta, a 210 familiares que forman parte da rede de apoio de cada unha delas. Ademais, visitáronse 72 empresas, sendo as 57% novas no proxecto, acadando a colaboración do 30% destas. Conseguiuse asinar un contrato para 30 persoas en desemprego e prácticas para 41, á vez que se logrou manter o 100% dos empregos.
Para a consecución do obxectivo marcado neste proxecto leváronse a cabo distintas actividades: Desde valorar e orientar ás persoas usuarias cara ao emprego, ata a procura de traballo ou prácticas, pasando por apoiarlles nos seus postos e intervir coas súas familias.
O proxecto impacta na calidade de vida das persoas usuarias dun modo moi positivo xa que adquiren unha responsabilidade e unha autoestima moi importante para levar a cabo unha vida o máis normalizada posible. Grazas a este, varias persoas usuarias obtiveron a súa primeira ou unha nova experiencia laboral e outros moitas, conseguiron facer prácticas laborais nunha contorna laboral, mellorando así as súas posibilidades de empregabilidade.
Así é o programa de Emprego Con Apoio
Desde o ano 2002, as entidades Down en Galicia desenvolven o servizo de Emprego Con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de tentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos seus compañeiros e compañeiras de traballo e na mediación na relación con eles para que se desenvolva de maneira positiva e natural.
Entradas relacionadas
