[Foto de arquivo]
Unha fiestra pola que compartir experiencias, inquedanzas e opinións, na que as persoas coa síndrome de Down e outras discapacidades intelectuais poidan amosarse como son e contar abertamente o que pensan e o que son capaces de facer. Con esa intención naceu “O noso espazo”, unha das interesantísimas seccións da web da asociación Down Lugo.
“O noso espazo” está pensado para ser un lugar onde os rapaces e rapazas da entidade se sintan cómodos para expresarse sen reservas e mediante o que traballan a lectura, a escritura, a comprensión, así como as habilidades comunicativas e a relación entre os compañeiros e compañeiras da entidade.
Esta iniciativa ten a súa orixe nun obradoiro creado hai algúns anos co obxectivo de habilitar un espazo no que as persoas usuarias da asociación puideran comentar e analizar cuestións do seu interese, ao tempo que coñecen noticias da actualidade a través da prensa (en papel e online) e aprenden a manexala.
A través de distintos artigos escritos de forma periódica, as persoas participantes falan e opinan de diferentes temas, tales como experiencias persoais, temas de actualidade social e política, curiosidades, información da cidade e do país, etc.
Os redactores e redactoras de “O Noso Espazo” seguen sempre unha mesma metodoloxía para elaborar os seus artigos. En primeiro lugar, elixen a temática en función dos seus gustos ou intereses para, a continuación, levar a cabo unha procura e selección de información sobre o tema a traballar. A partir de aí comeza a redacción da nova, que en ocasións conta historias persoais, noutras combina información e opinión persoal e noutras constitúe un artigo informativo.
Ao longo destes anos xa son moitos os temas traballados: as súas primeiras experiencias laborais e formativas, festas populares, voluntariado, viaxes, temas de actualidade, películas, música… e os que quedan!
Non esperedes máis para coñecer este espazo!
Accede pinchando aquí.
