AFACO contrata a unha moza de Down Coruña como axudante de cociña
A discapacidade intelectual entrou de cheo este pasado luns 2 de maio nas aulas da Facultade de Administración e Dirección de Empresas do Campus de Lugo da USC, onde o alumnado da materia Fundamentos da Xestión e dos Recursos Humanos tivo a ocasión de saber máis sobre a realidade que depara o mercado laboral ás persoas coa síndrome de Down e outras discapacidades intelectuais.
A través dos testemuños de traballadores, traballadoras e técnicos de emprego da asociación Down Lugo e tamén da responsable do Servizo de Participación e Integración Universitaria da USC na sede universitaria luguesa, Fátima Teixeiro, coñeceron de primeira man a situación actual.
A sesión, organizada co obxecto de darlle visibilidade á situación das persoas con discapacidade intelectual, así como ás dificultades específicas que deben sortear para acadar un emprego ordinario, ademais de sensibilizar ao propio alumnado de ADE sobre a necesidade de traballar a prol da inclusión social e laboral do colectivo, serviu asemade para dar a coñecer ao estudantado do Campus lucense o ‘Programa de Emprego con Apoio’, sinal de identidade do Movemento Down en Galicia.
Os técnicos de emprego da asociación Down Lugo, Sarai Lodeiro Castro e Francisco Varela Guerrero, explicaron diante do alumnado as características da iniciativa impulsada en aras de facilitar e mellorar a empregabilidade das persoas coa síndrome de Down.
De seguido, interviñeron como relatores nesta sesión aberta sobre discapacidade intelectual o responsable de RRHH e a responsable de Arquivo na área Administración de AmsLab, David Seijas e Sabela Arias, respectivamente; as traballadoras no McDonalds da capital luguesa Laura Otero e María Isabel Casanova; así como Saúl Montoya, empregado de Feuvert no taller de que dispón esta compañía en Lugo.
Unha vez rematadas as súas intervencións, nas que as persoas usuarias de Down Lugo puideron contar as experiencias vividas, todos os relatores mantiveron un interesante coloquio co alumnado respecto das particularidades e dificultades ás que teñen que enfrontarse as persoas con síndrome de Down ou aquelas que presentan calquera outro tipo de discapacidade intelectual para acceder a un posto de traballo.
Esta actividade de marcada pegada social chegou ao seu colofón logo de hora e media coa intervención da responsable do SPIU da USC no Campus de Lugo, Fátima Teixeiro, que puxo o foco na necesidade de que a sociedade se active e non escatime esforzos para avanzar na inclusión sociolaboral das persoas con discapacidade.
Entradas relacionadas
