A asociación Down Coruña conta coa danza como unha actividade máis do seu programa complementario cultural, e desenvólvena asistindo a clases en ArteStudio, academia que traballa impartindo clases de teatro e diferentes disciplinas de baile.

Alba, Laura e Estefi son as profesoras encargadas de formar ás e os membros da Asociación en danzas como o new style, danza caribeña, contemporánea ou moderna. Levan colaborando con Down Coruña desde o ano 2015, cando o grupo de baile da asociación estaba formado por 16 persoas. Durante a pandemia continuaron en contacto a través de clases en liña e recentemente volveron ao estudo, cun grupo de 9 mozas e mozos, para seguir bailando e gozando da boa compañía.

“Esperamos que pronto volvamos ter o grupo, en número, que tiñamos antes da COVID porque gozabamos moito con estas clases todas e todos xuntos” conta Laura, unha das monitoras da actividade.

Durante a clase semanal, que se celebra os venres de 18.00h a 19.30h, realizan exercicios de coordinación, flexibilidade e mellora das habilidades motoras, ademais de diferentes coreografías.

Judo co Club  Ximnasio Fibra

A finais do pasado mes de abril, varios mozos e mozas membros de Down Coruña puideron coñecer de primeira man as técnicas do  judo nunha xornada de portas abertas ofrecida polo Club Ximnasio Fibra.

O encontro tivo lugar nas instalacións deste espazo deportivo, onde o deporte inclusivo e a atención á diversidade realízanse con moita profesionalidade e naturalidade.

Durante a xornada, novos socios de Down Coruña compartiron espazo con outras persoas vinculadas á entidade que xa integraban o equipo deportivo de judo do ximnasio. Aprenderon e practicaron as técnicas básicas do deporte, acompañados do seu director José López Gacio, pero, sobre todo, gozaron coñecendo esta nova faceta deportiva en gran compañía.