Down Experience, a iniciativa de restauración da asociación Down Coruña, acábase de unir á plataforma de envíos a domicilio Just Eat, a plataforma en liña de reparto de comida a domicilio líder en España, para a distribución dos seus produtos de ‘O Quiosco’. Desta maneira, calquera persoa que se atope na cidade da Coruña poderá gozar do mellor de Down Experience sen moverse do lugar onde se atope.

Os pedidos poderanse realizar a través da web ou a aplicación móbil de Just Eat entre as 12:00 e as 22:30 horas, podendo gozar en calquera momento da oferta completa de ‘O Quiosco’.

Desde a compañía de delivery apoian este tipo de iniciativas, pioneiras en Galicia, que demostran que as persoas coa síndrome de Down e outro tipo de discapacidades intelectuais son capaces de emprender ou de formar parte de calquera empresa como asalariados.

En palabras de Paula Pascual, directora de Vendas de Just Eat España: “Desde que coñecemos a iniciativa de ‘O Quiosco de Down Experience’ tivemos claro que nos queriamos unir. Encántanos o proxecto e o que supón como lugar de encontro para todos os coruñeses, ademais do gran proxecto de inclusión que impulsa. Quixemos axudarlles para que ese delicioso bocadillo de luras e toda a súa interesante proposta gastronómica poida chegar a máis xente grazas ao noso reparto de comida a domicilio. Agora, con Just Eat, todos os coruñeses poderán darse o capricho sen moverse de casa”.

O director executivo de Down Experience, Manuel Rego, valora positivamente esta unión. “Cando tes un proxecto o único que queres é coidalo, darlle un futuro, e aquí é onde entran en xogo empresas como Just Eat. É unha das marcas referentes en canto a pedidos a domicilio no noso país que, desde o primeiro momento, mostráronnos o seu apoio para seguir impulsando esta iniciativa que tan boa acollida ten entre a xente de Coruña e os seus visitantes”.

Manuel Rego recalca, ademais, a gran dimensión que alcanza esta colaboración a través do mítico bocadillo de luras, “un manxar tradicional que a todos os coruñeses e coruñesas nos trae bos recordos”.