O pasado mes de abril de 2022 leváronse a cabo as probas correspondentes ao proceso selectivo para o acceso á categoría de pinche pola quenda de discapacidade intelectual, convocado polo Servizo Galego de Saúde e correspondente á Oferta de Emprego Público do ano 2020.

Dezaoito mozos e mozas das entidades Down de Galicia decidiron presentarse a este concurso-oposición para intentar acadar un traballo fixo e estable nunha contorna ordinaria, que puidese dar estabilidade á súa situación económica e facilitar así a consecución dunha vida máis autónoma e independente.

Os resultados definitivos, publicados hai poucas semanas, falan por si sós: o 83% das persoas que se presentaron aos exercicios correspondentes a este proceso selectivo conseguiron superalos con éxito.

Á espera da análise de méritos, varias delas poden acadar unha das 39 prazas convocadas, pero haberá que agardar aínda un pouco máis para sabelo.

Desde Down Galicia queremos darlle os parabéns a todas as persoas que se presentaron, xa que as ganas e o esforzo son o primeiro andar para acadar, antes ou despois, todas as metas que se propoñan.