Tras máis de 14 anos traballando na área de Urbanismo do Concello de Vigo, Noela Avendaño acaba de consolidar a súa praza de funcionaria na administración local, converténdose na primeira persoa usuaria de Down Vigo en obter una praza fixa de emprego público.
Un convenio asinado entre a entidade e o Concello da cidade olívica deulle a primeira oportunidade a esta moza coa síndrome de Down, que, á vista do conseguido, soubo aproveitar co seu bo traballo dixitalizando licenzas municipais.
O acto de sinatura da súa praza, no que estivo acompañada da súa familia, tivo lugar a pasada semana na sede da administración. Como representantes institucionais asistiron Abel Caballero, alcalde de Vigo; Mª José Caride, concelleira de Urbanismo; e José Manuel García Orois e Roberto Campo, presidente e director de Down Vigo, respectivamente.
O seguinte reto, a independencia
Noela comeza a súa xornada moi cedo, collendo un barco dende Cangas para incorporarse ao seu posto de traballo ás 8:30 horas. Está totalmente integrada cos seus compañeiros e compañeiras e participa activamente das iniciativas do seu departamento.
Por iso, tras conseguir a estabilidade laboral e facer gran parte da súa vida en Vigo, o seu próximo reto é independizarse.
Desde Down Galicia temos a seguridade de que conseguirá todo o que se propoña e dámoslle os nosos parabéns por exemplificar á perfección que a inclusión real é posible.
