A Federación Down Galicia e BBVA asinaron esta mañá en Santiago de Compostela un convenio de colaboración para a posta en marcha dunha nova edición do programa de prácticas formativas ‘Emprego con Apoio’, que promove a inclusión socio-laboral de persoas coa síndrome de Down e outras discapacidades intelectuais. A directora da Territorial Noroeste de BBVA, Marta Alonso, e o presidente de Down Galicia, Delmiro Prieto, asinaron o acordo de colaboración en nome de ambas as institucións.

A sede de Down Galicia foi escenario da firma deste acordo de colaboración. A través deste programa, que consiste na realización de prácticas formativas en oficinas galegas da entidade bancaria, as persoas participantes adquiren unha experiencia laboral que lles axudará no proceso de procura de emprego, ademais de mellorar as súas habilidades sociais para a súa inclusión en diferentes equipos de traballo.

Ao longo deste ano, as persoas participantes traballarán durante un período aproximado dun mes en distintas oficinas de BBVA da Coruña, Lugo e Vigo. O proxecto desenvolverase a través dun programa de capacitación para o emprego, un adestramento laboral no posto de traballo, un seguimento laboral continuado e unha formación permanente.

No acto celebrado hoxe, Marta Alonso Blanco, directora da Territorial Noroeste de BBVA, destacou que “cremos que os equipos diversos achegan novos puntos de vista e gañan nun dobre sentido. Por unha banda, as persoas con discapacidade aprenden a desenvolverse nunha contorna nova que favorece a súa inclusión socio-laboral e, por outro, o noso persoal enriquécese con persoas que achegan unha visión e unha experiencia distintas”.

Pola súa banda, Delmiro Prieto, presidente de Down Galicia, resaltou “a necesidade de contar co apoio do tecido empresarial, pois é crucial para que o futuro da nosa sociedade estea baseado na igualdade, a equidade e a inclusión de todas as persoas”. Prieto aproveitou a súa intervención para convidar “a todos os empresarios e empresarias a descubrir as múltiples capacidades das persoas coa síndrome de Down e outras discapacidades intelectuais”.

Desde o ano 2012, o programa de prácticas formativas, promovido por BBVA en colaboración con Down Galicia, apoiou a formación de 112 mozos e mozas e supuxo en todas as súas edicións anteriores unha experiencia moi positiva e de gran valor, non só para as persoas participantes, senón tamén para os empregados e empregadas do banco.