As asociacións Teima Down Ferrol e Down Coruña foron dúas das entidades gañadoras dos II Premios de Boas Prácticas en Servizos Sociais da Deputación da Coruña, un recoñecemento ás institucións que traballan no eido social e na protección dos colectivos máis vulnerables na provincia.

Desta forma, os proxectos “Marcho que teño que marchar” e “Quiosco de Down Experience” foron escollidos polo xurado para acadar este recoñecemento, consistente nunha figura elaborada polo obradoiro Keramicos de APEM Coruña e 10.000 euros en metálico.

O IES Rosalía Mera da Coruña foi o escenario da entrega destes galardóns, aos que concorreron máis de medio centenar de entidades que desenvolven a súa actividade en áreas como atención á infancia e a mocidade, persoas con discapacidad, maiores, inmigración, apoio a persoas trastornos aditivos ou persoas en risco de exclusión social.

Nesta edición tamén resultaron premiadas a Asociación de Pais de Persoas con Trastorno de Espectro Autista TEA (Aspanaes) e a Asociación Ámbar, completándose os galardóns con dúas mencións honoríficas á Asociación pro Personas con Discapacidad Intelectual de Galicia (Aspronaga) e á Asociación Integro de Personas con Diversidade Funcional.

Os proxectos de Teima e Down Coruña

“Marcho que teño que marchar” é un proxecto centrado no fomento da vida independente. Patricia Serantes, presidenta de Teima Down Ferrol, quixo dar as “grazas pola confianza e polo respaldo que supón para unha entidade pequena e humilde un premio coma este”.

Pola súa parte, o “Quiosco Down Experience” é unha iniciativa de inserción sociolaboral no eido da restauración, na que persoas con e sen discapacidade desenvolven os coñecementos propios da profesión de barista e traballan ofrecendo cafés, bocadillos de luras e outras propostas gastronómicas aos clientes que os visiten no local do que dispoñen na Praza de Ourense da Coruña.

Ricardo Santos, presidente de Down Coruña, destacou que no relativo á inclusión das persoas coa síndrome de Down “un dos ámbitos máis importantes é o laboral” e convidou ás persoas asistentes a “ir ao quiosco, desfrutar do quiosco, aproveitar o bocata de luras e pasalo ben”.