A axenda dos mozos e mozas usuarias de Down Lugo estivo repleta de eventos e actividades durante todo este verán. Cultura, natureza, tecnoloxía, deporte, ecoloxismo… todo tivo cabida nestes meses estivais.
Así, as persoas usuarias da entidade puideron desfrutar de plans tan variados como visitar unha exposición no Museo Interactivo da Historia de Lugo, realizar un taller de lettering, andainas por Foz e pola Ruta das Chousas, participar nun taller de DJs no barrio da Milagrosa, visitar a Aula da Natureza do Veral, elaborar cadernos de campo en Sargadelos-Cervo, facer ioga ao aire libre, competir nunha xincana no parque Rosalía de Castro, pasar a tarde na piscina ou xogar ao pádel, entre outras actividades.
Tamén houbo tempo de experimentar coa robótica nun taller no que aprenderon a programar a través de xogos ou de saber máis sobre reciclaxe a través dun divertido bingo.
Unha nova edición da xuntanza de familias tralo parón pola COVID
O pasado 9 de xullo, Down Lugo retomou a súa tradicional festa de familias de verán, que levaba varios anos sen celebrarse por mor da pandemia.
O lugar escollido para esta edición foi a localidade lucense de Triacastela, onde as persoas participantes puideron desfrutar dunha xornada de ocio e convivencia e participar en varias actividades.
O día comezou coa visita a unha queixería artesá na parroquia de As Pasantes, onde puideron ver como se fai o queixo do Cebreiro á maneira tradicional. Posteriormente, algunhas familias baixaron ata Triacastela facendo unha parte do Camiño de Santiago, desfrutando da paisaxe de Oribio e admirando a árbore centenaria de Ramil.
Xa en Triacastela, os mozos e mozas da entidade asinaron no Libro de Ouro do municipio e máis tarde, xunto coas familias, comeron na praza do concello.
A tarde estivo amenizada por unha actuación teatral e, ao seu remate, as persoas participantes na xornada fixeron unha pequena ruta polos montes da zona.
Unha xornada inesquecible!