A Asociación Down Coruña acaba de presentar o seu novo Calendario Solidario 2025, un proxecto que reflicte o compromiso, a alegría e a determinación das persoas coa síndrome de Down que forman parte da nosa comunidade. Este ano, o calendario ten un significado aínda máis especial, xa que Down Coruña celebra 25 anos traballando pola diversidade e a inclusión.
Onde podes conseguilo?
O calendario está á venda nas seccións de papelería de:
- FNAC Praza de Lugo (A Coruña)
- O Corte Inglés da Coruña
O prezo é de tan só 10 € e con cada compra contribúes a que a sociedade sexa máis inclusiva e solidaria.
Por que é especial este calendario?
Este calendario non é soamente unha homenaxe ás persoas coa síndrome de Down, senón tamén unha ferramenta de sensibilización, xa que a entidade quere achegar á sociedade os valores que promove: diversidade, inclusión e recoñecemento do valor de cada individuo.
Con este proxecto, Down Coruña pon en circulación 1.000 exemplares durante a tempada do Nadal. Cada calendario vendido axuda a seguir impulsando o seu traballo e a dar visibilidade ao enorme potencial das persoas coa síndrome de Down.
Desde a asociación queren expresar o seu máis sincero agradecemento a todas as persoas e empresas que colaboran con eles para que este calendario sexa unha realidade.
Achégate a calquera dos puntos de venda e consegue o teu calendario. Fai que estas festas sexan aínda máis significativas, apoiando unha causa que promove o cambio social.