Santiago Futsal, club compostelán que milita na División de Honra do fútbol sala español, elixiu as instalacións da Fundación Down Compostela para presentar como os primeiros embaixadores da entidade a dous históricos do club, o xogador hispano brasileiro Alemao e o adestrador salmantino Tomás de Dios. Tras a presentación, Alemao entregou a mozos e mozas de Down Compostela un paquete de carnés de abonados para que poidan presenciar os partidos de liga do equipo compostelán durante esta tempada. Alemao, que comprou persoalmente o paquete de abonados para axudar ao Futsal, repetirá esta mesma actuación con Cáritas e Cruz Vermella. O presidente do Santiago Futsal, Ramón García, cualificou o acto como “o máis especial desde que son presidente, porque Alemao (que gañou aquí Copa, Supercopa e Recopa) e Tomás, aparte de dous grandes profesionais, son dúas moi boas persoas que levan ao noso club e os seus valores por todo o mundo” O presidente de Down Compostela Juan Martínez, que estivo acompañado por Elías Ledo Vázquez, agradeceu a Ramón García que o Santiago Futsal pensara en Down Compostela para presentar aos primeiros embaixadores do club, e recordou que na Fundación hai un nutrido grupo de seguidores do fútbol sala. Ao mesmo tempo deu as grazas a Alemano por “ceder os abonos aos mozos e mozas seguidores do Santiago Futsal”, o que lles permitirá ver os partidos que xoguen na casa sen “que isto supoña un custe adicional para moitas familias que o están pasando mal nestes momentos, xa que, ademais de facer fronte á crise económica, esfórzanse por axudar a unha persoa con discapacidade enuna época de recortes”.
