Con motivo do 65 aniversario da aprobación da Declaración Universal dos Dereitos Humanos de 1948, Down Galicia participou no acto público de conmemoración coa lectura do Artigo 26, que recolle o dereito á educación. O acto, promovido polo Seminario Galego de Educación para a Paz, celebrouse no Salón Nobre do Pazo de Fonseca e contou coa presenza de destacados persoeiros do mundo da cultura e da política galega, así como de alumnado de varios colexios compostelás que tamén participaron na lectura. En representación de Down Galicia, o presidente da Federación, Delmiro Prieto, deu lectura ao artigo referente ao dereito á educación. O artigo 26 reivindica como obxectivo da educación o pleno desenvolvemento da personalidade humana e o fortalecemento do respecto aos dereitos humanos e ás liberdades fundamentais; o favorecemento da comprensión, a tolerancia e a amizade entre todas as nacións e todos os grupos étnicos e relixiosos; e a promoción do desenvolvemento das Nacións Unidas para manter a paz. O mesmo artigo defende que toda persoa ten dereito á educación, que esta debe ser de balde, polo menos no que se refire á instrución elemental e fundamental, e obrigatoria na etapa elemental. Tamén reclama que a instrución técnica e profesional terá que ser xeneralizada; e o acceso aos estudios superiores será igual para todos, en función dos méritos respectivos. Por último, o artigo 26 recolle que os pais terán dereito preferente a escoller o xeito de educación que se lles deberá dar aos seus fillos.
