Ribadeo da un novo paso na inclusión laboral das persoas con discapacidade intelectual coa presentación do Programa Laboral de Inclusión, unha iniciativa que permitirá a incorporación durante un ano dunha traballadora da asociación Down Lugo ao persoal municipal, con funcións de ordenanza e dependencia directa da Alcaldía. O programa nace da colaboración entre o Concello, a Xunta de Galicia e Down Lugo, e enmárcase na metodoloxía de Emprego Con Apoio que Down Galicia promove para favorecer a verdadeira inclusión sociolaboral.
A protagonista desta incorporación é Nazaret Barroso, do veciño concello de Lourenzá, unha moza vinculada a Down Lugo que xa viña desenvolvendo un itinerario formativo orientado ao emprego e á administración pública. A súa chegada ao Concello sitúa a inclusión no propio día a día dun servizo municipal e converte Ribadeo nun novo exemplo de administración aberta á diversidade e ao talento das persoas coa síndrome de Down.
Durante a presentación do programa, o alcalde de Ribadeo, Dani Vega, destacou a importancia de abrir as administracións públicas á inclusión real e de ofrecer oportunidades laborais que permitan avanzar cara a unha sociedade máis igualitaria. O rexedor puxo en valor a colaboración coa asociación e sinalou que a incorporación de Nazaret supón “un paso importante” para o Concello, ademais dun exemplo de compromiso social e institucional coa diversidade.
Pola súa banda, a presidenta de Down Lugo, María José Blanco, subliñou que cando unha persoa ten a oportunidade de demostrar a súa valía profesional “estamos rompendo o ciclo da exclusión e permitindo que a súa contribución social sexa visible e valorada en igualdade de condicións”. Neste sentido, incidiu en que o acceso ao emprego é “o motor que transforma a percepción da discapacidade nunha percepción de capacidade e talento”, permitindo avanzar cara a unha sociedade na que a diversidade sexa entendida como un valor engadido.
María José Blanco tamén quixo facer un chamamento a outras administracións e entidades para que dean pasos semellantes e confíen en programas de inclusión laboral como o que desenvolve a entidade. “Animamos a todos os concellos e entidades a que perdan o medo e se acheguen a programas como Emprego Con Apoio. Ao incorporar unha persoa coa síndrome de Down ao voso cadro de persoal, non só estades cumprindo cun deber ético, estades converténdovos nun referente e nun modelo a seguir para toda a comunidade”, destacou.
A contratación de Nazaret Barroso supón ademais un novo avance no traballo que Down Lugo desenvolve desde hai anos para favorecer a inclusión laboral das persoas coa síndrome de Down e outras discapacidades intelectuais, acompañando ás persoas participantes tanto na súa formación como na adaptación aos postos de traballo. A entidade continúa así impulsando oportunidades reais de emprego en contornos ordinarios, demostrando que, co apoio adecuado, as persoas poden desenvolver o seu labor profesional con autonomía, responsabilidade e plena participación social.