Contabilizáronse 1.125 accións de orientación para un total de 325 persoas con discapacidade intelectual en busca activa de emprego. As accións desenvolvéronse no período que abarca desde febreiro de 2013 a xaneiro de 2014, incrementando nun 12,8% o número de persoas atendidas con respecto ao período anterior. As accións de orientación realizadas van encamiñadas a facilitarlle estratexias e recursos adecuados aos demandantes de emprego do colectivo de persoas coa síndrome de Down e discapacidade intelectual, de xeito que a súa busca activa de emprego sexa máis efectiva. Os grandes grupos de accións de orientación laboral compóñense de itinerarios personalizados de inserción, sesións grupais e entrevistas personalizadas, co obxectivo de dar resposta ás necesidades dos demandantes de emprego en función do seu perfil profesional. O servizo conta con persoal técnico especializado e realiza as súas actuacións nas principais cidades galegas. Para elo, conta con dúas orientadoras laborais, que prestan servizo itinerante desde os dous Centros de servizo, ubicados en Santiago e Vigo, para dar cobertura á zona norte da Comunidade galega – Ferrol, Lugo, Monforte de Lemos, A Coruña, Carballo e Compostela-; e á zona sur –Ourense, Pontevedra e Vigo-. O Servizo de Orientación Laboral de Down Galicia (IOBE) é centro colaborador do Servizo Público de Emprego de Galicia, tendo competencias en materia de modificación de datos e actualización dos currículos dos demandantes titorizados por Down Galicia. Este servizo está financiado pola Consellería de Traballo e Benestar, a través da Dirección Xeral de Emprego e Formación.
