Iris Curra, unha moza que forma parte do Servizo de Emprego con Apoio de Down Vigo, acaba de incorporarse ao equipo de traballo que a tenda Scalpers, marca de retail especializada en moda, ten na céntrica rúa Príncipe da cidade olívica.
Esta é a súa primeira experiencia laboral, un primeiro contrato que afronta con especial ilusión. Iris, que cursou o Programa ALIDA -formación superior inclusiva no perfil administrativo- xa realizara con anterioridade prácticas formativas en diferentes empresas, ás que sumará esta nova oportunidade no sector da moda, aumentando así a súa capacitación profesional.
Cun contrato inicial de seis meses, Iris cumpre un dos seus soños: “traballar en moda”. O seu posto consiste en realizar tarefas en dúas áreas da tenda: a propia superficie de vendas e o almacén. En tenda, encargarase da reposición e perfilado de produto. En almacén, o seu labor consistirá na recepción e colocación de mercadoría, así como na recepción de pedidos. Tras as primeiras semanas de traballo, Iris traslada que desta nova experiencia laboral gústalle “todo”, aínda que recoñece unha dificultade: “dáme un pouco de medo subir á escaleira no almacén”. Aínda así, afronta a tarefa con valentía porque, como indica, “quero superarme”.
Así como as tarefas son importantes, tamén o é o ambiente laboral, no que Iris se atopa especialmente cómoda. “Os meus compañeiros son moi simpáticos e súper bos comigo. Trátanme ben e axúdanme en todo. Sempre se preocupan por como estou”.
Pola súa banda, desde o equipo de Scalpers tamén valoran como positiva a incorporación de Iris, destacando que están “contentos” coa súa incorporación e esperan que estea “a gusto” nesta nova experiencia, na que, consideran, eles e elas tamén poderán aprender de Iris.
Resaltan que “ten moitas ganas e iniciativa para aprender”, que é “sempre atenta, amable e educada” e que “lle gusta traballar en equipo e o traballo cos compañeiros”.
A incorporación de Iris ao persoal de Scalpers conta con todos os elementos para converterse nunha experiencia de aprendizaxe laboral de éxito para todos: ganas, iniciativa e a mellor das actitudes por parte da traballadora e o resto do persoal, disposta a facilitar a súa inclusión no posto de traballo.
Desde Down Vigo agradecen a Scalpers a oportunidade para seguir sumando experiencias positivas de inclusión laboral no tecido empresarial vigués.