Un total de 141 persoas, participantes no programa de Emprego con Apoio da Federación Down Galicia, estiveron contratadas en empresas ordinarias da súa contorna durante o ano 2017. Este dato constata a mellora, aínda que lenta, na inserción laboral das persoas coa síndrome de Down e outras discapacidades intelectuais, xa que o número total de persoas usuarias do servizo que contaron cunha oportunidade laboral aumentou nun 11% con respecto ao ano anterior.
Aínda así, soamente o 62% das persoas que conforman a bolsa de emprego de Down Galicia tiveron acceso a un posto de traballo neste período. Este baixo porcentaxe vén dado pola considerable subida no número de participantes no programa, que nesta ocasión ascendeu ás 226 persoas usuarias, deixando constancia da importancia que as persoas coa síndrome de Down e outras discapacidades intelectuais lle outorgan a ter un emprego. E é que traballar contribúe de xeito eficaz a desterrar os tópicos que tradicionalmente se lles atribúen a este colectivo, resultando un xeito sumamente eficaz de inclusión social.
A través destas contratacións, os traballadores e traballadoras puideron adquirir experiencia en postos tan variados como técnico en educación infantil, auxiliar de masaxista, monitor de comedor escolar, promotor de produtos, peón vinícola, mariñeiro ou ordenanza, entre moitos outros.
En canto á distribución por localidades, obsérvase que foron 56 persoas as que traballaron neste 2017 na zona de Vigo, 17 en Pontevedra, 16 en A Coruña, 15 en Compostela, 13 en Ferrol e 12 en Ourense e Lugo, mellorando as cifras con respecto ao ano anterior en tódalas localidades e demostrando deste xeito a utilidade e a aceptación desta metodoloxía entre o tecido empresarial privado.
Non obstante, o principal escollo para o colectivo de persoas con discapacidade intelectual segue a ser a inestabilidade e a temporalidade nas contratacións. Así, as 141 persoas que tiveron unha oportunidade laboral durante o pasado ano contaron cun total de 168 contratos, o que pon de manifesto a curta duración das contratacións en moitos dos casos.
O contrapunto vén da man das prórrogas dos contratos e das transformacións dos mesmos en indefinidos, que se elevan a 16 e a 11 respectivamente, o que demostra o bo facer dos traballadores e traballadoras nos seus postos de traballo.
Destaca tamén o elevado número de prácticas laborais realizadas polos usuarios e usuarias das entidades Down en Galicia (74), coas que reforzan a súa motivación cara o emprego e melloran as súas habilidades socio-laborais. Sumando contratos e prácticas, case o 80% das persoas usuarias do programa de emprego de Down Galicia contaron con unha oportunidade no eido laboral o pasado ano.
Sen embargo, aínda que se constata que os datos seguen unha tendencia ascendente desde hai uns anos, o acceso a un posto de traballo de forma normalizada segue a ser un dos grandes retos das entidades que traballan a prol da inclusión laboral na empresa ordinaria.
Acceso ao Emprego Público
O Diario Oficial de Galicia publicou o pasado mércores a adxudicación de prazas reservadas en exclusiva para persoas con discapacidade intelectual, na categoría de ordenanza. Das prazas ofertadas, unha será para Jacobo Rey González, un mozo coa síndrome de Down membro de Down Ourense, que considera este éxito “un soño feito realidade”.
Comezou a preparase en xaneiro de 2015 e o de ordenanza é o terceiro proceso selectivo ao que se presenta. Durante meses, coa constancia por bandeira, Jacobo dedicou moitas horas do seu día a día ao estudo desta oposición.
O acceso ó emprego público para as persoas con discapacidade intelectual en xeral, e coa síndrome de Down, en particular, é unha das reivindicacións históricas da Federación Down Galicia.
A metodoloxía Emprego con Apoio
Desde o ano 2002, as entidades Down en Galicia desenvolven o programa Emprego con Apoio, deseñado para atender especificamente as necesidades e barreiras que as persoas coa síndrome de Down e outras discapacidades intelectuais atopan á hora de intentar acceder ao mercado laboral ordinario.
Este modelo baséase nun sistema estruturado de apoios e acompañamentos para guiar ás persoas demandantes de emprego a través de todo o proceso de inserción socio-laboral e asegurar a súa correcta incorporación ao posto de traballo. Deste xeito, as persoas que se incorporan a un posto, contan co apoio dun preparador ou preparadora laboral que se encarga de levar a cabo unha formación específica no propio posto de traballo, para que o traballador ou traballadora poida ir adquirindo progresivamente unha adecuada execución das tarefas. O apoio tamén se centra na potenciación da interacción social cos compañeiros e compañeiras de traballo e na mediación na relación con eles para que se desenvolva de xeito positivo e natural.