Todo está xa preparado para que Santiago de Compostela acolla dúas das citas máis importantes no calendario do movemento Down en España: o XVIII Encontro Nacional de Familias e o X Encontro Nacional de Irmáns que organizan a federación DOWN ESPAÑA e a FUNDACIÓN DOWN COMPOSTELA, e no que as persoas con trisomía 21 volverán ter un papel significativo.

Máis de 500 persoas poderán gozar do 6 ao 9 de decembro dunha experiencia que persegue aumentar a cohesión entre o colectivo de persoas coa síndrome de Down e a súa contorna. As xornadas, que se desenvolverán nos hoteis OCA Puerta del Camino e Eurostars San Lázaro, potencian o debate sobre temas de interese para o colectivo, fomentan a vinculación e o intercambio de experiencias, e, sobre todo, conceden protagonismo ás persoas con trisomía 21.

O acto inaugural celebrarase o xoves 6 de decembro ás 19:30 horas no Palacio de Congresos e estará presidido polo alcalde de Santiago, Martiño Noriega Sánchez. Ao mesmo confirmaron xa a súa asistencia a Conselleira de Política Social, Fabiola García Martínez; o Director General de Políticas de Discapacidad do Ministerio de Sanidade, Jesús Celada Pérez; a Vicepresidenta da Deputación da Coruña, Goretti Sanmartín; e o Vicepresidente Executivo da Fundación ONCE e Presidente de Ilunion, Alberto Durán; que acompañarán aos presidentes de DOWN ESPAÑA,  Mateo San Segundo, e DOWN COMPOSTELA, Juan Martínez, entre outras autoridades.

Durante este acto, que estará conducido por dous mozos con trisomía 21, DOWN ESPAÑA entregará o ‘Premio Trébol a la Solidaridad 2018’ á investigadora Mara Dierssen, quen ao día seguinte pronunciará a conferencia inaugural titulada ‘Cara a unha terapia na síndrome de Down? Bioética, reflexión e panorama de futuro’. A apertura do congreso concluirá cunha actuación conxunta de mozos e mozas de DOWN COMPOSTELA e do Espazo de Danza da USC que dirixe Juan Carlos Zahera.

Durante todas as xornadas haberá diversas sesións formativas, talleres e conferencias sobre diferentes temas. Mozos coa síndrome de Down serán relatores en dúas das mesas sobre emprego e vida en parella e vida independente. Nas sesións tamén se abordarán temas relacionados coa investigación, a capacidade das persoas con discapacidade para tomar decisións sobre a súa saúde, as súas obrigacións e dereitos, ademais do papel da familia e o profesorado cara a unha escola inclusiva, así como o papel e retos que deben afrontar os irmáns.

Pero este Encontro tamén incluirá actividades lúdicas e momentos de lecer para toda a familia, como unha peregrinación á Catedral de Santiago ou unha visita guiada pola cidade.

Para a organización do encontro, DOWN ESPAÑA e DOWN COMPOSTELA contaron co patrocinio da Dirección Xeral de Maiores e Persoas con Discapacidade da Consellería de Política Social e a colaboración da Fundación ONCE, Concello de Santiago, Deputación de A Coruña, Galicia Calidade, Ternera Gallega, Consellería do Mar, Fundación Sanitas, Carrefour Santiago, Bankia, Ministerio de Cultura y Deporte e Centro Xuvenil Don Bosco.