O pasado 7 de febreiro comezou unha nova etapa para Saúl Álvarez, un mozo usuario da asociación Down Ourense.
El foi unha das persoas beneficiarias das “Bolsas destinadas a persoas con discapacidade intelectual para a formación práctica na Universidade de Vigo”, que teñen por obxectivo a formación de mozos e mozas con discapacidade intelectual para que sexan capaces de desenvolverse en diferentes contextos sociais e laborais e lograr así a súa progresiva inclusión no mercado laboral, conseguindo graos de autonomía e independencia persoal.
En concreto, Saúl está a realizar a súa formación como Auxiliar de Servizos Xerais na Conserxería do Edificio Xurídico Empresarial que a Universidade de Vigo ten no Campus de Ourense.
No desenvolvemento destas prácticas formativas, de tres meses de duración, poderá aprender tarefas como a clasificación e repartición de correo interno, a preparación do correo externo (cartas ordinarias e certificadas), a atención ao alumnado e docentes, a atención telefónica, a reserva de aulas, a entrega de chaves de aulas e seminarios, a revisión dos taboleiros de anuncios e tarefas de mantemento.
Esta é a primeira experiencia profesional de Saúl, que esperemos poida abrirlle un mundo de posibilidades e oportunidades laborais nun futuro moi próximo.
