O mes de xullo converteuse nun espazo privilexiado de aprendizaxe, lecer e convivencia para Down Lugo. A entidade apostou por un calendario cheo de actividades deportivas, culturais e sociais que permitiron ás persoas participantes explorar novos intereses, reforzar vínculos e participar activamente na vida da cidade.
Un dos eixos principais foi o deporte na comunidade, co apoio de entidades locais que abriron as portas á diversidade:
– No ximnasio Esculture, o grupo achegouse ao boxeo da man de Toni, combinando exercicio físico, coordinación e moita diversión. A experiencia foi nova para moitas persoas usuarias, que superaron medos iniciais e gozaron dunha disciplina tan completa como estimulante.
– Tamén probaron a esgrima co Club Lugo Esgrima, onde, co equipo e as instrucións necesarias, tiveron unha primeira toma de contacto cun deporte de precisión e respecto, adaptado ás súas necesidades.
– Unha das actividades estrela foi a xornada de piragüismo co Club de Piragüismo Cidade de Lugo, que lles permitiu experimentar a sensación de remar en equipo, manter o equilibrio e conectar coa natureza desde unha perspectiva nova e motivadora.
– Por outra banda, grazas a Team Maxi, as persoas participantes puideron iniciarse no tenis, descubrindo un deporte dinámico que favorece a concentración, a coordinación e o traballo individual.
Estas propostas deportivas completáronse con outras experiencias que tamén contribuíron á inclusión e ao benestar: clases de bailes urbanos organizadas polo Concello, saídas fotográficas polas rúas de Lugo, visitas culturais, sendeirismo, tardes de xogos de mesa e actividades creativas na sede da entidade.
Entre as accións máis motivadoras destaca a elaboración de xoguetes para cans, que serán doados a protectoras da costa de Lugo. Unha actividade que combina habilidades manuais, conciencia social e moita ilusión.
Desde Down Lugo agradecen a todas as entidades, profesionais e persoas colaboradoras que fixeron posible un mes cheo de aprendizaxes e sorrisos.