Explorar a cidade, descubrir novas paixóns e sentirse parte activa da comunidade. Con estas premisas, Down Coruña desenvolveu este verán tres actividades singulares que teñen como eixo común a inclusión e a participación no entorno: marcha nórdica, judo e danza. Cada unha destas propostas, en colaboración con entidades comprometidas, busca non só ofrecer experiencias enriquecedoras senón tamén fortalecer a autonomía, o benestar e a visibilidade das persoas participantes.
Marcha nórdica con AMI: en movemento cara a autonomía
No marco do programa “Explorando a cidade”, dezaseis persoas usuarias de Down Coruña participaron nunha actividade de iniciación á marcha nórdica no Paseo dos Pontes, da man da Agrupación de Montañeiros Independentes (AMI). A xornada, conducida pola técnica deportiva Rebeca xunto ao equipo profesional de Down Coruña, combinou exercicio físico, coordinación e conexión coa contorna urbana, percorrendo un itinerario accesible ata o Obelisco do Milenium.
A marcha nórdica, para moitas persoas participantes, era unha disciplina descoñecida. Con todo, a experiencia foi ben acollida e vivida como unha oportunidade para coñecer algo novo, mellorar a forma física e, sobre todo, gozar en grupo. A práctica demostrou ser un xeito de fomentar a autonomía e a motivación a través do deporte.
AMI, referente do montañismo galego cunha longa traxectoria inclusiva, colabora con Down Coruña desde hai anos, promovendo espazos onde a diversidade suma. O seu proxecto “Camina-Escala-Oriéntate” foi recentemente recoñecido na Gala do Deporte da Coruña, reforzando unha alianza que seguirá dando froitos cara ao futuro.
Judo para todos no Gimnasio Fibra: deporte con valores
O 10 de xullo, Down Coruña viviu unha nova experiencia inclusiva cunha sesión de iniciación ao judo no Gimnasio Fibra. A actividade, guiada por José Ramón, Borja e Desi, permitiu achegarse a esta arte marcial desde o respecto, a disciplina e a cooperación, valores centrais tanto no deporte como na inclusión social.
Para moitas persoas participantes, foi a primeira vez sobre un tatami, e a acollida non puido ser mellor. A través de xogos, exercicios guiados e moito entusiasmo, compartiron aprendizaxes e superaron pequenos retos. “Ver como gozan, aprenden e se senten parte de algo positivo é a mellor recompensa”, sinalaba José Ramón ao finalizar.
O Club Gimnasio Fibra mantén desde hai anos unha estreita colaboración con Down Coruña, promovendo o acceso ao deporte adaptado. A súa traxectoria e compromiso vense reforzados polos logros internacionais de deportistas como Paula López e Dante Eizayaga, exemplo de que o judo tamén é un camiño para a inclusión e o éxito persoal.
Danza en Artestudio: emocións que se bailan
O pasado 11 de xuño, o escenario de Artestudio acolleu unha actuación moi especial: o peche do curso de danza protagonizado por alumnos e alumnas de Down Coruña. Un espectáculo cargado de emoción, resultado dun proceso artístico guiado por Laura Santamariña e Lúa Cárdenas, onde cada ensaio foi construíndo vínculos, confianza e expresión persoal.
A coreografía representou non só o aprendido en termos de movemento, senón tamén o valor do traballo en equipo e o orgullo de compartir co público o esforzo realizado. Un dos momentos máis destacados foi ver como cada participante amosaba a súa personalidade sobre o escenario, facendo do espectáculo unha auténtica celebración colectiva.
Desde 2023, a escola Artestudio está dirixida por Estefanía Gómez e Laura Santamariña, e mantén unha aposta decidida polo arte inclusivo como ferramenta educativa e comunitaria. Esta actuación anual, que reúne a familias, profesionais e espectadores, é un reflexo da forza transformadora da cultura cando se fai accesible e participativa.
Estas tres experiencias confirman que a inclusión real sucede cando se abren espazos para compartir, crear e avanzar xuntos. Nas entidades Down de Galicia trabállase para que cada actividade na contorna sexa unha oportunidade de visibilizar capacidades, xerar aprendizaxes e construír unha sociedade máis xusta e diversa.