Proxecto Luna é unha iniciativa da asociación Down Vigo que naceu hai xa varios anos a través dunha colaboración con Marcos González, mellor barista de España na actualidade e responsable de calidade de Delikia Fresh.
Nos seus inicios, ao abeiro do proxecto, Down Vigo organizou varios Campionatos de Baristas Down, e máis adiante, en colaboración coa empresa Delikia, comezou a participar na iniciativa Café Solidario que se organiza cada Nadal na cidade olívica.
E o proxecto, que pouco a pouco ía vendo como crecía, consolidouse no ano 2019 coa participación dun barista coa síndrome de Down, Rober Pereira, no Campionato de Baristas de Foz, onde ademais de amosar as súas habilidades no mundo do café acadou un contrato de traballo indefinido.
Sen embargo, a pandemia freou o percorrido do Proxecto Luna, paralizando a súa actividade ata hai unhas semanas, cando Marcos González convidou a varios mozos e mozas da entidade a servir os cafés da súa nova marca, Root Café, durante as pausas entre conferencias dos tres días nos que se celebraba a Értek Conference.
Cada un dos días asistiron tres persoas coa síndrome de Down ou outras discapacidades intelectuais acompañadas por unha persoa de Root Café e outra de Down Vigo, e as súas tarefas centráronse na atención ao cliente e no manexo da máquina de café.
A Érték Conference son unha serie de relatorios e talleres promovidos por un grupo de estudantes da facultade de Ciencias Sociais e da Comunicación do Campus de Pontevedra, dirixidas a completar a formación do alumnado das diferentes titulacións da facultade en ámbitos como o marketing e a comunicación.