As persoas coa síndrome de Down presentan unha maior vulnerabilidade ante a gripe debido á alteración da resposta inmune asociada á trisomía 21. Por iso, desde Down España, tendo en conta as consideracións do seu Comité Médico Asesor, recomendan a vacinación anual fronte á gripe estacional a todas as persoas coa síndrome de Down maiores de 6 meses, seguindo a pauta establecida no calendario de vacinación.
Ademais, recoméndase administrar unha dose de reforzo da vacina contra a COVID-19 a todas as persoas coa síndrome de Down, co obxectivo de reducir tanto o impacto da enfermidade en caso de contaxio como o efecto que esta pode ter a longo prazo en forma de COVID persistente.
Ambas as vacinas teñen por obxectivo protexer á poboación, especialmente aos grupos con maior risco de presentar complicacións en caso de padecer a enfermidade. As dúas vacinas poden ser administradas ao mesmo tempo, sen que exista ningunha contraindicación para iso.
Estas recomendacións de vacinación contra a gripe e COVID-19 fanse extensibles á contorna das persoas coa síndrome de Down (familiares, convivintes…), especialmente a aquelas persoas de idade avanzada ou que presenten outros factores de risco. Ademais, a recomendación esténdese tamén a persoal de centros sanitarios e sociosanitarios.
A campaña de vacinación en Galicia
En Galicia, a campaña de vacinación comezará o próximo día 25 de setembro e prolongarase ata o 31 de decembro.
Do mesmo xeito que en campañas anteriores, a vacinación levarase a cabo en diferentes puntos e o inicio será secuencial para favorecer a priorización dos colectivos con maior risco. Así, as persoas institucionalizadas en residencias de maiores e centros de discapacidade serán vacinadas a partir do 25 deste mes na súa contorna por equipos específicos, ofrecendo a vacina fronte á gripe e a COVID-19.
Pola súa banda, os servizos de atención primaria administrarán a vacina fronte a gripe e COVID-19 ás persoas de 80 e máis anos, que serán citadas mediante unha mensaxe de texto. Así mesmo, vacinaranse a domicilio ás persoas inmobilizadas que pertenzan aos grupos diana e os hospitais públicos dispoñerán de doses da COVID-19 e gripe para a vacinación dos grupos de alto risco.
Ademais, habilitaranse grandes recintos ao longo do mes de outubro nas áreas sanitarias e distritos para a vacinación conxunta fronte á gripe e a COVID-19 dos menores de 80 anos. Estas persoas tamén serán citadas mediante unha mensaxe de texto.
A Xunta de Galicia indica tamén que os puntos de vacinación da gripe habituais como son os centros de saúde, hospitais, centros privados, residencias, e mutuas, só administrarán a vacina fronte á gripe. Nestes puntos, o ou a paciente pedirá a cita cando corresponda segundo a secuencia establecida.