“Non é un reto deportivo, senón un encontro entre os participantes co fin de xerar vínculos e fomentar valores como a cooperación e o traballo en equipo, ese é o factor diferencial desta carreira”. Así definía esta mañá Lois Babarro, Presidente da Asociación de Jóvenes Empresarios de Ourense, a Carreira das Empresas, que celebrará a súa segunda edición o domingo 8 de outubro polas rúas da cidade. Por iso, a inscrición está aberta a todos os que queiran unirse para percorrer eses 6 quilómetros e que pertenzan non só a empresas, senón tamén a organismos, concellos, institucións, colexios, facultades, etc.
“A participación na primeira edición foi de 308 corredores, e confiamos superar esa cifra na deste ano”, dicía tamén Babarro na presentación desta mañá, na que estivo acompañado polo vicepresidente da asociación, César González, e colaboradores do evento como o alcalde da cidade, Jesús Vázquez, e o subdirector comercial de La Región, Carlos Barbosa.
A carreira terá saída e chegada no pavillón Paco Paz, onde se entregarán dorsais á primeira hora da mañá. Os corredores inscritos comezarán ás 10:30 da mañá este circuíto urbano que discorrerá polo Barbaña, rúas Desengaño, Paseo e Santo Domingo, Praza Maior, As Burgas e, de novo, o Barbaña e o Paco Paz. Para finalizar, os participantes citaranse ás 12 en Expourense para a entrega de trofeos e degustar un aperitivo. Os premios consistirán en trofeos ás distintas categorías (pendentes de determinar pola organización) e agasallos dos distintos patrocinadores.
A inscrición, dispoñible na web www.championchipnorte.com, custará 7 euros por persoa e pódese realizar por equipos de 2 a 5 persoas (cada empresa ou institución pode anotar tantos grupos como queira). Seguindo coa tendencia solidaria que os novos empresarios imprimen ás súas actividades e eventos, de cada inscrición destinarase un euro á asociación Down Ourense, entidade seleccionada este ano para este fin e destacada co galardón ao labor solidario nos últimos premios de AJE Ourense.