Distribuciones Froiz confía de novo no programa de Emprego de Xuntos para a campaña de Nadal
A Asociación Down Pontevedra “Xuntos” pon en marcha, un ano máis, a celebración da súa tradicional Gala Benéfica, que acada xa a súa edición número 23. O espectáculo celebrarase o vindeiro venres 10 de xaneiro ás 20:30 horas, no Auditorio do Pazo da Cultura de Pontevedra, coa colaboración dunha ducia de artistas. As entradas anticipadas poden adquirirse na Perfumería Tito de La Peña, na Rúa Oliva 24, ou no local da Asociación, situado na Rúa do Gorgullón 41. O mesmo día do evento poderanse comprar na billeteira do auditorio. O prezo das mesmas é de 8 euros para os adultos e de 5 euros para os nenos menores de 12 anos, ata completar aforo.
O evento converteuse nunha das iniciativas insignia da Asociación grazas á dirección do director musical e cantante Ángel Barry. Con esta gala anual recádanse fondos destinados a financiar os programas diarios da entidade, que conxuntamente forman o Servizo de Promoción de Autonomía Persoal (SEPAP). Este comprende as seguintes Áreas de Traballo: Atención Temperá, Inclusión Educativa, Formación e Emprego, Vida Adulta e Independente, Área Complementaria (Expresión Corporal, Novas Tecnoloxías e de Lecer), e Área Transversal (Programa de Familias e programas de sensibilización).
Música, baile e humor nun amplo cartel
A Gala Benéfica da Asociación Down Pontevedra “Xuntos” reunirá, como xa é habitual, artistas de renome do panorama galego e pontevedrés, combinando diferentes disciplinas artísticas, que van desde a danza, pasando pola interpretación, o humor e, como non, a música, a gran protagonista. Entre os artistas que encabezan o cartel deste ano atópanse a artista lucense Lucía Pérez, o humorista Isi e a cantante Tania Fuegho.
Por circunstancias profesionais, a Orquestra Pontevedra, que sempre encabezou o cartel, non acompañará a “Xuntos” neste evento, como o veu realizando nas 22 edicións precedentes. Si o fará o seu director musical e vocalista, Ángel Barry, que ademais conducirá a gala xunto a varios mozos da Asociación.
O cartel está composto polos seguintes artistas:
– LUCÍA PÉREZ: Cantante e presentadora habitual da TVG. Artista con sete álbums publicados que representou a España no Festival de Eurovisión 2011.
– ISI: Actor, humorista e presentador. Colaborador en diversos programas da TVG e Radio Galega.
– TANIA FUEGHO: Cantante e compositora. Destaca a súa colaboración habitual co mítico programa “Luar” de TVG onde participa como xurado do talent show “Recantos”.
– ÁNGEL BARRY: Cantante e director musical. Capitanea a Orquestra Pontevedra desde hai case 20 anos. Publicou discos e colaborado con moitos artistas na súa carreira.
– MARIETTA: Cantante afincada en Pontevedra con varios discos publicados, dominando o xénero das rancheiras e a canción lixeira galega.
– CHRISTIAN: Artista polifacético de variedades que combina o transformismo, o humor, o musical e a interpretación. Recoñecido por ser a estrela do Music Hall.
– GUILLERMO CASTRO: Cantautor galego especializado en bachata con varios álbums no mercado.
– ANDREA G. GONZÁLEZ: Pianista ferrolá e compoñente do Coro da Orquestra Sinfónica de Galicia cunha intensa actividade concertística como solista e co dúo Quodlibet.
– LUIZINHO ASTRAL & JANE ZOUK: Bailaríns profesionais de orixe brasileira que dirixen a escola de baile LJ Studio de Dança.
– ULISES E O SEU GRUPO DE BAILE
– AXOUXERE GRUPO DE TEATRO: Compañía teatral formada por actores e actrices da asociación. Actualmente representan a obra “Retallos”.
– ÁNGEL FERNÁNDEZ: Batería e usuario da asociación.
Como xa é tradición nesta gala, a organización non descarta actuacións sorpresa.
A Asociación Down Pontevedra “Xuntos” agradece a Ángel Barry, vocalista e director musical da Orquestra Pontevedra, todo o esmero e dedicación cara a este evento, xa que sen a súa imprescindible colaboración este non sería posible, nin puidese alcanzar as 23 edicións consecutivas.
Entradas relacionadas
