A sede da Deputación de Pontevedra en Vigo (R/ Eduardo Chao, 17) acolle ata o vindeiro venres 29 de xaneiro a exposición “El viaje de mi vida”, na que persoas usuarias do grupo de Habililidades Adaptativas de Down Vigo mostran a súa sensibilidade artística cun conxunto colorista de tapices elaborados coa técnica do patchwork e inspirados en vivencias persoais.
O presidente da entidade, José Manuel García Orois, explicou que a exposición “é unha forma de promover a autonomía das persoas coa síndrome de Down e diversidade intelectual”. A colección de tapices, engadiu, “mostra que teñen moitas capacidades, de traballo, artística, e de expresión dos seus sentimentos e emocións”. García Orois agradeceu á Deputación de Pontevedra a súa colaboración para poder mostrar á cidade esta iniciativa.
A presidenta da administración provincial, Carmela Silva, asistiu ao acto de apertura xunto ao presidente de Down Vigo e o director da entidade, Antonio Fortes. Silva destacou o “gran traballo e compromiso da asociación, que facilita que as persoas coa síndrome de Down e diversidade intelectual teñan as mesmas oportunidades que todas e todos debemos ter”.
A máxima responsable da Deputación de Pontevedra destacou a obra de Arancha, Antonio, Lola, Lucía M., Luci R., Manuela, Marcelo e Noa.
Carmela Silva anunciou así mesmo nesta presentación, realizada unicamente cos responsables de ambas as institucións para cumprir coas medidas de seguridade fronte á COVID-19, que tan pronto a situación sanitaria mellore, a mostra retornará á sede da Deputación “cun acto no que as persoas que elaboraron os tapices teñan o protagonismo que lles corresponde, e para que a xente veña a coñecela con normalidade”. En todo caso, a presidenta animou á cidadanía para visitar durante estes días a exposición en grupos reducidos. “Quedarán sorprendidos e sorprendidas. Son tapices moi fermosos e hai moito traballo en cada un deles”, resaltou.
O proceso creativo
Durante o proceso, “El viaje de mi vida” transformouse nunha viaxe emocional onde cada un dos e das artistas, a través da arte, sacan as súas vivencias e os seus recordos á luz.
Antonio reflicte como cambiou a súa vida por mor de acudir á Asociación. Para Arancha é un reflexo das dificultades do envellecemento. Lola reflexiona sobre o duelo e como aprender a vivir con el sen perder a vitalidade. Lucía M. rende homenaxe á súa familia, aos que están e aos que xa non están. Lucía R. soña cun tapiz e unha vida de conto de fadas. Igual que Manuela, que expresa os seus desexos e inquedanzas. O tapiz de Marcelo trata dunha parte moi íntima da súa vida: como viviu a emigración. Como Noa, que ten o seu corazón dividido nos seus fogares de dous países.
Cada tapiz é único, como cada historia é única.
Down Vigo contou coa colaboración de diversas persoas e empresas locais, sen cuxa axuda non sería posible desenvolver este proxecto.