Achégase o 21 de marzo, unha data crave para as organizacións que traballamos na inclusión das persoas coa síndrome de Down. O Día Mundial da Síndrome de Down é o momento no que, cada ano, nos diriximos á sociedade cunha mensaxe de reivindicación.
Este ano, Down España cumpre 30 anos e por iso nosa nova campaña ten un propósito moi distinto: esta vez queremos dar as #GraciasPorTanto aos centos de miles de cidadáns e cidadás que, desde o voso anonimato e sen buscar ningún recoñecemento, axudades, facilitades e, en definitiva, facedes a vida máis bonita ás persoas coa síndrome de Down.
#GraciasPorTanto é unha homenaxe a todos e todas vós, porque sen o voso apoio, sen ese sorriso da camareira do bar, sen a axuda do condutor de autobús, sen esa amabilidade da caixeira do súper, sen a proximidade da dependenta da tenda da esquina… e de tantos e tantas outras… as persoas coa síndrome de Down non chegarían tan lonxe nin estarían tan incluídas na sociedade.
Sabemos que corren tempos convulsos e que nestes momentos todos temos parte do noso corazón posto nas miles de vítimas desta guerra atroz en Ucraína que ten en ascuas ao mundo enteiro. Pero non podemos nin queremos esquecernos das persoas coa síndrome de Down, nin tampouco queremos esquecernos de todo o que fixestes por elas nos últimos anos. Por iso queremos pedirvos que vos unades á nosa campaña e que a compartades nas vosas redes sociais para que a nosa mensaxe de agradecemento chegue a cada unha das persoas que algunha vez, ou cada día, melloran a vida das persoas coa síndrome de Down coa súa amabilidade, compresión, apoio ou agarimo.
A nosa campaña deste ano, vai por todos vós! #GraciasPorTanto
A campaña
Alba ten 30 anos e vive no pequeno Barrio de San Carlos, en Cádiz. Baixo a súa casa está a panadería de Rosa, a quen coñece de toda a vida. Alba quería darlle as grazas a Rosa por recibila na súa tenda sempre cun sorriso e preocuparse por ela e a súa familia… Así que enchemos un teatro de Cádiz ao completo para darlle a Rosa a sorpresa da súa vida.
Grazas a 200 colegas, fixemos crer a Rosa que ía acudir a unha gala na que se entregaba o premio ao mellor comerciante do Barrio de San Carlos. O que Rosa non imaxinaba era todo o que ocorrería despois…
Queremos agradecer a todas e cada unha das persoas que fixeron posible esta campaña:
A Alba, a Rosa, a Vero, á presentadora Lourdes Maldonado, ao cómico José Campoy, a Down Cádiz (os seus mozos e mozas, familias e profesionais), a nosa axencia Contrapunto BBDO, á produtora Possible Films, ao Teatro La Tía Norica de Cádiz, ao Concello da cidade e aos 200 colegas que nos axudaron a encher o Teatro para darlle unha incrible sorpresa a Rosa.
