A pesar de que aínda falta moito para poder falar dunha verdadeira inclusión educativa, en Galicia existen centros e profesorado que apostan decididamente por ela. Un deles é o CPR Inmaculada Maristas de Lugo, que o recentemente finalizado curso 2022-2023 levou a cabo un proxecto centrado na inclusión a través dun maior coñecemento da síndrome de Down. O proxecto, titulado “O diario de Berta”, conta o día a día na escola de Berta, unha moza misteriosa coa síndrome de Down.
Entre as distintas actividades que compoñían o proxecto, Chus e Carlos, persoas usuarias da asociación Down Lugo, participaron nalgunhas delas durante o mes de xuño.
Chus, que ademais é traballadora do centro educativo, acudiu ás aulas de 3º de primaria para contar as súas experiencias profesionais, e que desta forma puidesen coñecela un pouco máis.
Carlos, pola súa banda, acudiu coas nenas e nenos da súa aula de terceiro de primaria a visitar a entidade Down. Unha vez alí, ensinoulles todo o local e faloulles sobre as actividades que realiza cando acode á asociación. Finalmente, todas as persoas participantes realizaron un concurso por equipos demostrando todo o aprendido sobre síndrome de Down e discapacidade.
Por outra banda, os días 3, 4 e 5 de xullo, o centro educativo convidou o equipo profesional da área de Educación de Down Lugo a impartir unha formación ao profesorado sobre Deseño Universal de Aprendizaxe (DUA) e boas prácticas en Inclusión Educativa.
Nun ambiente moi agradable, derrubaron barreiras que impiden a educación inclusiva, reflexionaron, multinivelaron actividades e deseñaron traballos fantásticos sobre diferentes temáticas, dando resposta á diversidade que nos atopamos nas aulas.
Desde Down Galicia queremos dar as grazas ao CPR Inmaculada Maristas por ofrecer a Down Lugo a posibilidade de colaborar durante todo o curso e por demostrar que a educación inclusiva si é posible!