Zaragoza acolleu do 5 ao 8 de decembro o 25º Encontro Nacional de Familias de Down España, unha edición que reuniu máis de 600 persoas e que contou, un ano máis, coa participación de familias pertencentes a entidades Down de Galicia. O evento, organizado xunto coa asociación Up&Down, celebrou o seu 25º aniversario cun amplo programa de convivencia e formación.
A inauguración tivo lugar no Palacio de Congresos de Zaragoza, coa presenza de autoridades locais e un acto que incluíu tres actuacións musicais e a entrega do Premio Trébol á axencia Contrapunto BBDO, recoñecida pola súa colaboración altruísta nas campañas de sensibilización durante os últimos oito anos. Esta gala marcou o inicio dun fin de semana centrado no intercambio de experiencias, obradoiros e aprendizaxes para avanzar na defensa dos dereitos e no benestar das persoas con síndrome de Down.
O programa ofreceu conferencias, obradoiros e actividades dirixidas a nais, pais, irmáns e irmás, ademais de propostas de lecer compartido. A conferencia plenaria situou a xestión emocional como eixo principal grazas á intervención do doutor en Ciencias da Educación Martín Pinos, quen salientou a importancia do autocuidado con mensaxes como “estar ben para coidar ben”.
As xornadas dedicaron tamén espazos a cuestións xurídicas relevantes para as familias, entre elas a maioría de idade, a curatela ou o patrimonio protexido. Expertas como a avogada María Cristina Chárlez e a fiscal Avelina Alía achegaron orientación práctica para afrontar estas etapas con maior seguridade.
A innovación tecnolóxica contou igualmente con protagonismo. O asesor dixital de Down España, Jon Merino, presentou Minerva, un asistente virtual baseado en intelixencia artificial deseñado para mellorar a accesibilidade e facilitar o acceso a información clave sobre o síndrome de Down. Esta ferramenta continúa en fase piloto e aspira a converterse nun recurso útil para milleiros de usuarios.
O debate sobre vida independente, lecer e autonomía reuniu profesionais como o coordinador da Rede de Vida Independente, Pep Ruf, a vicepresidenta de FIADOWN, Irma Iglesias, e Lourdes Roda, da Fundación Down Zaragoza. As intervencións coincidiron na necesidade de contornas máis accesibles e na importancia de garantir o dereito das persoas con síndrome de Down a tomar decisións sobre a súa propia vida. “A vida independente non é un privilexio, é un dereito que hai que garantir”, subliñou Ruf.
A investigación contou tamén cun espazo destacado coa participación do doutor Rafael de la Torre, quen presentou avances de proxectos europeos orientados a mellorar a calidade de vida e a cognición das persoas con síndrome de Down. Entre eles, sinalou o potencial dos estudos ICOD e GO-DS21, que poderían supoñer progresos significativos nos vindeiros anos.
O Encontro concluíu cunha cea de gala no restaurante Aura, onde as familias celebraron conxuntamente o peche dunha edición especialmente significativa. Durante a velada anunciouse que a vindeira cita terá lugar en outubro de 2026 na cidade de Murcia, con Fundown como entidade anfitrioa.